隔晚美股個別發展，道指再創新高，但喺通脹壓力加劇，提早加息陰霾下，科技股受壓，納指跑輸大市下跌。港股噚日復跌過百點後，今早一度反彈逾300點，可惜A股五一假期後表現遜色，拖累港股一度下跌，中午收市升幅則大大縮水。恒指高開229點重返100日線(28606)，一度升335點見28753點半日高位，其後A股表現未如理想，拖累港股一度倒跌33點，見28384點半日低位。中午恒指報收28466點，升48點，始終未能收復100日線；國指則跌19點，報收10702點，恒科技繼續無厘神氣，跌14點，報收8093點。不過北水假後回歸，確令成交暢旺咗，半日成交額半日增加至929.97億元。
耶媽對於息口向去出口術，斷估唔會因為一時貪口爽，又或者失言而後來補鑊。反而係因為佢心裡有數，喺百物騰貴，物價飛升下，通脹定必重臨，而可以控制通脹嘅有效工具，就係加息。誰知係咁矣提女一提加息，美股已經打晒震，為咗安撫市場情緒，耶媽急急澄清，而聯儲局嗰邊亦幫手解畫，美股先穩定返。但從呢一次耶媽放風試水溫，已睇得美股幾怕息魔重臨，一旦通脹殺到埋身，真係唔知聯儲局可以點應對。
藍籌股個別發展，ATMX以小米(01810)表現至標青，公司表示歐洲手機市佔率超越蘋果公司，股價半日升2.4%，但美團(03690)、騰訊(00700)下跌，阿里(09988)則靠穩。大笨象(00005)跟友邦(01299)反彈，工行(1398)跟平保(02318)則下跌。
拜登政府決定放棄新冠肺炎疫苗知識產權專利，之前炒到出煙嘅疫苗股全部插水，康希諾(06185)大跌21%；復星醫藥(02196)暴瀉18%；而研究治療肺炎藥物嘅開拓藥業(09939)亦跌12%。其他生物科技股，CRO藥股則個別發展，藥明生物(02269)半日仲有得升都算係咁。噚日阿Man提醒高追當炒股要嚴守止蝕，唔好彩高追中伏，睇位止蝕好自為之。
消費股又係板塊輪到，今日餐飲股跌，體品股升，暫時餐飲股嘅走勢較弱，咪多手亂接刀。至於體品股維持強勢，有貨喺手set定個止賺位，一見掉頭好食糊套利。祖龍娛樂(09990)得到騰訊增持，涉資超過4億元，股價裂口高開後即掉頭，多手高追嘅好睇位投降。至於資源股今日個別發展，阿Man就吼位喺20元樓下收集江西銅(00358)，睇好銅價升勢有餘未盡，而今年銅供應仍緊張，江西銅料可受惠，H股現價仍吸引，有機會獲估值重評。
麥狄文
(徐狄怡‧證監會持牌人)
Post a Comment for "【盤房來料】睇好銅價升勢未盡 吼位收集江西銅"